මීට සුළු මොහොතකට පෙර එක්සත් ජාතික පක්ෂයේ මන්ත්‍රීවරු හය දෙනකු පාර්ලිමේන්තුවේ විපක්ෂයේ සිට සභා ගැබ මැදින් ගොස් ආණ්ඩු පක්ෂයට එකතු විණි

එක්සත් ජාතික පක්ෂයේ නියෝජ්‍ය මහ ලේකම් ලක්ෂ්මන් සෙනෙවිරත්න, අබ්දුල් කාදර්, නිමල් සෙනරත් විජේසිංහ (නිල්වලා) අර්ල් ගුණසේකර, මනුෂ නානායක්කාර මන්ත්‍රීවරු සහ උපේක්ෂා ස්වර්ණමාලි මන්ත්‍රීවරිය මෙසේ ආණ්ඩුව පක්ෂයට එකතුවන විට ආණ්ඩු පක්ෂයේ මන්ත්‍රීවරු ද ප්‍රීති ඝෝෂා නඟමින් ඔවුන්ට සුබ පැතූහ.

මෙසේ ආණ්ඩු පක්ෂයට එක්වීම‍ට පෙර අබ්දුල් කාදර් මන්ත්‍රීවරයා විසින් විශේෂ ප්‍රකාශයක් කරමින් මේ ව්‍යවස්ථා සංශෝධනයටත් රට සංවර්ධනය කිරීමේ ඉදිරි වැඩපිළිවෙලටත් ජනාධිපති මහින්ද රාජපක්ෂ මහතාට අප හය දෙනාගේ සහයෝගය ලබා දෙන බව සඳහන් කෙළේ ය.

මීට සුළු මොහොතකට පෙර ‍18වන ආණ්ඩුක්‍රම ව්‍යවස්ථා සංශෝධන පනත් කෙටුම්පත තුනෙන් දෙකක වැඩි ඡන්දයෙන් පාර්ලිමේන්තුවේ දී සම්මත විණි.

අද පෙරවරුවේ සිට පැවති විවාදයෙන් පසු ව රාත්‍රී 7.00ට පමණ ඡන්ද විමසීම සිදු කෙරිණි. ආණ්ඩුක්‍රම ව්‍යවස්ථා සංශෝධන පනත් කෙටුම්පතට පක්ෂ ව ඡන්ද 161ක් ද විපක්ෂ ව ඡන්ද 17ක් ද ලැබිණි. වැඩි ඡන්ද 144 කින් පනත් කෙටුම්පත සම්මත විය. 

මේ ව්‍යවස්ථා ‍සංශෝධනය හොඳ බවත් ඒ සඳහා තමාගේ සහයෝගය ලබා දෙන බවත් එක්සත් ජාතික පක්ෂ පාර්ලිමේන්තු මන්ත්‍රී අබ්දුල් කාදර් මහතා පවසයි.

‘මේ යටතේ ජනතාවට තමන් කැමති ඕනෑ ම අයෙක් ඔවුන් කැමති වාර ගණනක් ජනාධිපති ධුරයට පත්කිරීමේ හැකියා‍ව තිබෙනවා. මේ නිසා මෙයින් ප්‍රජාතන්ත්‍රවාදයට හානියක් වෙන්නේ නෑ.

අනෙක් අතට මේ නීතිය ආණ්ඩු පක්ෂයට විතරක් නෙවෙයි එක්සත් ජාතික පක්ෂයටත් වලංගුයි. ජනතාව කැමති නම් ඡන්දෙ දෙයි, එහෙම නැතුව බලෙන් ගන්න බෑ.

මෙය සම්මත කරගැනීම සඳහා ආණ්ඩුව ඡන්ද 175ක් ගන්නවා. ‍මේකට සහයෝගය දක්වන විපක්ෂ මන්ත්‍රීවරු ඔවුන්ගේ කැමැත්තෙන් ‍ඒ දේ සිදුකරන්නේ. ආණ්ඩුවට ඔවුන් බලෙන් ගන්න බෑ. අද වන විට එක්සත් ජාතික පක්ෂය කැඩීබිඳී ගොස් තිබෙනවා යැයි ද ඔහු පවසයි.

මෙම ව්‍යවස්ථා සංශෝධනය සඳහා තමාගේ සහයෝගය ලබාදෙන්නේ කාගේවත් බලපෑමක් මත නොවන බව එක්සත් ජාතික පක්ෂ පාර්ලිමේන්තු මන්ත්‍රී මනූෂ නානායක්කාර මහතා පවසයි.

‘එය මගේ ස්ව කැමැත්තෙන් සිදුකරන දෙයක්. සමහර අය කියන ආකාරයට මෙයින් ප්‍රජාතන්ත්‍රවාදයට හානියක් වෙන්නෙ නෑ. ඡන්දෙ දෙන්නෙ කාටද කියලා තීරණය කරන්නේ මිනිස්සු.’

අනෙක මෙය පවතින ආණ්ඩුවට විතරක් නෙවෙයි වෙනත් ජනාධිපතිවරයෙකුටත් වලංගු වන බව ද ඔහු පවසයි.

අද පස්වරු 1.00ට නියමිත පරිදි පාර්ලිමේන්තුව රැස්‌ වේ. සභාවේ කටයුතු ආරම්භයේ දී අග්‍රාමාත්‍ය දි. මු. ජයරත්න මහතා විසින් ව්‍යවස්ථා සංශෝධන පනත් කෙටුම්පත සභාගත කරනු ලබයි.

හෙට පාර්ලිමේන්තුව පෙරවරු 9.30ට ආරම්භ වන අතර 18 වැනි ආණ්‌ඩුක්‍රම ව්‍යවස්ථා සංශෝධන පනත් කෙටුම්පත පිළිබඳ විවාදය දවස පුරා සිදු කොට ඡන්ද විමසීම පස්වරුවේ සිදු කිරීමට නියමිත ව තිබේ.

හදිසි නීතිය මසකින් දීර්ඝ කිරීමේ යෝජනාව අද දවස පුරා පාර්ලිමේන්තුවේ විවාද කරන අතර ඒ පිළිබඳ ව ඡන්ද විමසීම පස්වරුවේ පැවැත්වේ.

බස් ගාස්තු සංශෝධනය පිළිබද අද දිනයේදී තීරණයක් ගැනීමට සූදානම් බව ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න මහතා පවසයි. වැඩිදුරටත් අදහස් දක්වමින් එහි සභාපති ගැමුණු විජේරත්න මහතා සදහන් කලේ බස් ගාස්තු පිළිබඳ ජාතික ප්‍රතිපත්තියට අනුව පසුගිය ජූලි මාසයේදී බස් ගාස්තු සංශෝධනයක් සිදුවිය යුතුව තිබුනද  ප්‍රවාහන අමාත්‍යවරයා සමඟ පැවති එකඟතාවක් මත එය ක්‍රියාත්මක නොකළ බවයි. එහෙත් අමාත්‍යවරයා අදාළ එකඟතා බිඳ දැමීමට කටයුතු කිරීම නිසා බස් ගාස්තු සංශෝධනයක් පිළිබද අවධානය යොමුව ඇති බවයි.