අද  සිට මහමැතිවරණය ආශ්‍රිතව සිදුවන මැතිවරණ නීති උල්ලංඝනය කිරීම් හා ප්‍රචණ්ඩ ක්‍රියා සම්බන්ධයෙන් ක්‍රියා කිරීමට  සෑම දිස්ත්‍රික් ලේකම් කාර්යාලයක්ම ආවරණය වන පරිදි විශේෂ පොලිස් මැතිවරණ ඒකක පිහිටුවීමට පියවර ගෙන ඇත.මෙම නව වැඩපිළිවෙල මැතිවරණ කොමසාරිස්වරයා විසින් පොලිස්පතිවරයාට ලබා දී ඇති උපදෙස් මාලාවකට අනුව සිදුවේ.
ඒ අනුව, මෙම පොලිස් මැතිවරණ ඒකක ප්‍රධාන පොලිස් පරීක්ෂකවරයකුගේ මූලිකත්වයෙන් දවසේ පැය 24 පුරාම ක්‍රියාත්මක වීමට නියමිතය.

දිනෙන් දින ඉහළ යන මැතිවරණ ප්‍රචණ්ඩ ක්‍රියා හා මැතිවරණ නීති උල්ලංඝණය කිරීම් පිළිබඳව සලකා බලා මැතිවරණ කොමසාරිස්වරයා  මෙම පියවර ගෙන ඇත.

එක්සත් ජනතා නිදහස් සන්ධානයේ ජාතික ලැයිස්තුවට අයත් ජනතා නියෝජිතයින් නම් කර ඇති බව වාර්තාවෙයි. ඒ අනුව අගමැති රත්නසිරි වික්‍රමනායක මහතා ඇතුළු අමාත්‍යවරු කිහිප දෙනෙක්ද, පූජ්‍ය එල්ලාවල මේධානන්ද හිමියන්ද, පූජ්‍ය ඕමල්පේ සෝභිත හිමියන්ද, ප්‍රවීණ නිළි මාලනී ෆොන්සේකා, කතානායක වි.ජ.මු. ලොකුබණ්ඩාර, මහාචාර්ය රජීව විජේසිංහ මෙලෙස ජාතික ලැයිස්තුවට ඇතුලත් කොට ඇති බව වාර්තා වෙයි. එ.ජ.නි.ස. මහලේකම් අමාත්‍ය සුසිල් ප්‍රේමජයන්ත් විසින් මැතිවරණ කොමසාරිස් වෙත භාරදෙනු ලැබීය.

නාමයෝජන භාරදීම හෙට (26) මධ්‍යහ්න 12.00න් අවසන් වන අතර ‍දිස්ත්‍රික් ලේකම් කාර්යාල අවට ප්‍රමාණවත් අයුරින් පොලිස් ආරක්ෂාව යොදා ගැනීමට කටයුතු කරන ලෙස දිස්ත්‍රික් මැතිවරණ තේරීම් භාර නිලධාරීන්ට දැනුම් දී ඇති බව මැතිවරණ ලේකම් කාර්යාලය පවසයි.
හෙට දිනයේ දිස්ත්‍රික් ලේකම් කාර්යාලවල කාර්යන් පහසු වන ආකාරයේ වැඩපිළිවෙළක් යොදා ගන්නා ලෙස ද මැතිවරණ කොමසාරිස් දයානන්ද දිශානායක මහතා දැනුම් දී ඇත.

පාර්ලිමේන්තුව සඳහා ජනතා නියෝජිතයන් 196ක් සහ ජාතික ලැයිතුවෙන් මන්ත්‍රීවරුන් 29ක් තෝරා පත් කර ගැනීම සඳහා මෙම මැතිවරණය පැවැත් වේ.

ටී.එම්.වී.පී. නායක ශිවනේෂතුරෙයි චන්ද්‍රකාන්තන් විසින් උතුරු පළාත සඳහා නාමයෝජනා භාරදීම අද පෙරවරුවේ සිදුවිය. එහිදී අදහස් දැක්වූ ඔහු ප්‍රකාශ කර සිටි‍න්නේ මැතිවරණය සඳහා තමන් ප්‍රථම වතාවට ඉදිරිපත්වන බවත් තම බලාපොරොත්තුව වන්නේ උතුරේ ජනතාවට සේවය කිරීම බවත්ය.

මේ අතර දකුණු පළාත් සභාවේ ගාල්ල දිස්ත්‍රික්කය සඳහා අමාත්‍ය පියසේන ගමගේ මහතාගේ ප්‍රධානත්වයෙන් නාමයෝජනා භාරදීමද අද පෙරවරුවේදී සිදුවිය. ගාල්ල දිස්ත්‍රික් කණ්ඩායම සදහා දිවයිනේ ජනප්‍රියතම පුද්ගලයින් කිහිපදෙනෙකු ඇතුලත්ය. බද්දේගම සමිත හිමි, ප්‍රවීණ රංගන ශිල්පිණී ගීතා කුමාරසිංහ මහත්මිය, ආන්දෝලනාත්මක චරිතයක් වූ නිශාන්ත මුතුහෙට්ටි මහතාද ඒ අතර වෙයි. තම කණ්ඩායමට ශක්තිමත් පිරිසක් සිටින බවත් ගාල්ල දිස්ත්‍රික්කයෙන් වැඩිම පිරිසක් පාර්ලිමේන්තුවට යැවීමට හැකිවනු ඇති බවටත් බලාපොරොත්තු වන බව පියසේන ගමගේ මහතා පවසයි.

එළඹෙන පාර්ලිමේන්තු මැතිවරණය සඳහා මේ වන විට දිවයින පුරා දිස්ත්‍රික්කයන්ගෙන් ස්වාධීන කණ්ඩායම් 54ක් ඇප මුදල් තැන්පත් කර ඇතැයි මැතිවරණ මහ ලේකම් කාර්යාලය පවසයි.
මැතිවරණය සඳහා ඇප මුදල් තැන්පත් කිරීම ලබන 26 වනදා මධ්‍යාහ්න 12.00න් අවසන් වේ.

එසේම පසුගිය 19 වනදා ආරම්භ වූ නාමයෝජනා භාරගැනීම ද 26 වනදා මධ්‍යාහ්න 12.00න් අවසන් වේ.

මෙවර පාර්ලිමේන්තු මැතිවරණය ට තරග කිරීම සඳහා ඉදිරිපත්වන අපේක්ෂකයන්ගෙන් නාමයෝජනා බාරගැනීම අද (19) දින සිට අරම්භවීමට නියමිතය.නාමයෝජනා බාරදීමේ අවසන් දිනය ලබන 26 වෙයි.
නායෝජනා බාරගැනෙන දිස්ත්‍රික් ලේකම් කාර්යාල සඳහා විශේෂ පොලිස් ආරක්ෂාවක් ලබා දීමට කටයුතු යොදා ඇතැයි මැතිවරණ කොමසාරිස් කාර්යාල ආරංචි මාර්ග පවසයි.

පාර්ලිමේන්තු මහ මැතිවරණයට තරඟ කරනු ලබන ස්වාධීන කණ්ඩායම් 09 ක් ඊයේ ( 17 ) දිනය අවසන් වන විට ඇප මුදල් තැන්පත් කර ඇති බව මැතිවරණ කොමසාරිස් කාර්යාලය සඳහන් කරයි.
කොළඹ හා පුත්තලම යන දිස්ත්‍රික් වලින් කණ්ඩායම් දෙක බැගින් ද, කණ්ඩායම් තුනක් කළුතර දිස්ත්‍රික්කයෙන්ද, ගම්පහ හා වන්නි දිස්ත්‍රික්කයන්ගෙන් ස්වාධීන කණ්ඩායම් එක බැගින් ද ඇප මුදල් තැන්පත් කොට ඇත. ලබන 26 වන දින දක්වා ඇප මුදල් භාර ගැනීම සිදුවේ.

එළඹෙන මහ මැතිවරණයේ තැපැල් ඡන්ද සඳහා අයදුම්පත් භාරගැනීමේ කටයුතු අද (16) ආරම්භ කෙරේ. මෙය ලබන 22 දක්වා සිදුකරන බව මැතිවරණ මහලේකම් කාර්යාලය පවසයි.

මේ සඳහා වන සියලු කටයුතු මේ වන විට සූදානම් කර ඇති බව එම කාර්යාලය අනාවරණය කරයි. තැපැල් ඡන්ද අයදුම්කරුවන්ගේ අයදුම්පත් නියමිත සහතික කිරීමේ නිලධාරීන් මාර්ගයෙන් දිස්ත්‍රික් තේරීම්භාර නිලධාරීන් වෙත එවිය යුතුය. 2008 ඡන්ද හිමි නාම ලේඛනයේ නම සඳහන්ව ඇති රාජ්‍ය සේවකයන්ට මේ සඳහා අයදුම් කළ හැකිය.

මෙම මැතිවරණය සඳහා නාමයෝජනා භාරගැනීම ලබන 19 වනදා සිට 26 වනදා දක්වා සිදුකිරීමට නියමිතය.