වවුනියාව දිස්ත්‍රික්කයේ වඩ්ඩුනාගල පබ්බත විහාරයේ පුරාවිද්‍යා භූමිය සුරක්ෂිත කිරීමට කඩිනම් පියවර ගන්නා ලෙස බලධාරීන්ට නියෝග කරන ලෙස ඉල්ලා සිවිල් ක්‍රියාකාරීන් විසින් ගොනු කර තිබූ මූලික අයිතිවාසිකම් පෙත්සමක් ශ්‍රේෂ්ඨාධිකරණයේ සහය දැක්වීම සඳහා ඊයේ (30) දින නියම කරන ලදී.
අගවිනිසුරු ජයන්ත ජයසූරිය, විනිසුරු ඒ.එච්.එම්.ඩී. නවාස් සහ විනිසුරු අචල වෙන්ගප්පුලි යන ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල මෙම තීරණය ගෙන ඇත.
අභිනවයෙන් පත්කළ උතුරු පළාත් ආණ්ඩුකාරවරයා පෙත්සමට ඇතුළත් කර සති දෙකක් ඇතුළත සංශෝධිත පෙත්සම ගොනු කරන ලෙස පෙත්සම්කරුවන්ට නියෝග කළේය. මෙම පෙත්සම ජුනි මස 28 වැනිදා සහය දැක්වීමට නියමිතය.
පෙත්සම්කාර ගල්ගමුවේ ශාන්තබෝධි හිමි, බ්‍රිගේ. (විශ්‍රාමික) අතුල ද සිල්වා, මාධ්‍යවේදිනී ෂෙනාලි ඩී. වඩුගේ, ව්‍යාපාරික ජිහාන් හමීඩ්, නිල්හාන් පෝල් ප්‍රනාන්දු සහ උපාලි ජයසිංහ බණ්ඩාර යන මහත්ම මහත්මීන් විසින් ඔවුන්ගේ නීතිඥ දර්ශන වේරදූවගේ මාර්ගයෙන් මෙම පෙත්සම ගොනු කළේය.
වඩ්ඩමාන පර්වත (පබ්බත) විහාරය වෙඩිකින්නරිමලෙයි පුරාවිද්‍යා භූමිය වවුනියාව දිස්ත්‍රික්කයේ නයනයමඩු වනාන්තරයේ පිහිටා ඇත. පෙත්සම්කරුවන් කියා සිටියේ බෞද්ධ ආරාම සංකීර්ණයක් වන වඩ්ඩමාන පබ්බත විහාරය අනුරාධපුර යුගයේ මුල් භාගය දක්වා දිවෙන බවයි. සෙල්ලිපිවලට අනුව මෙම ලෙන් මහා සංඝරත්නයට (සාංගික) තිළිණ කර ඇත.
මෙම පෞරාණික බෞද්ධ ආරාමයට දීර්ඝ ඉතිහාසයක් ඇති බව පෙත්සම්කරුවන් සඳහන් කළේය. 2010 දී මෙම ස්ථානය පුරාවිද්‍යා දෙපාර්තමේන්තුව විසින් නැවත හඳුනා ගත් අතර එය පුරාවිද්‍යාත්මකව ආරක්‍ෂිත ස්මාරකයක් ලෙස ගැසට් කිරීමට යෝජනා විය. 2018 වසරේදී බ්‍රාහ්මී සෙල්ලිපි සහිත එක් ලෙනක බිම පිටතින් ගෙනැවිත් පස්වලින් පුරවා සමතලා කළ මෙම ස්ථානයේ විනාශකාරී ක්‍රියා සිදු වූ බව පෙත්සම්කරුවෝ චෝදනා කළහ. ගඩොල් ස්තූපයේ ගඩොල් ඉවත් කර ඇති අතර, දෙවියන්ගේ රූපයක් ඇතුල් කර ඇත.
පොලිස්පති චන්දන වික්‍රමරත්න, මහජන ආරක්‍ෂක අමාත්‍ය ටිරාන් අලස්, ජ්‍යෙෂ්ඨ නියෝජ්‍ය පොලිස්පති විජිත ගුණරත්න, නියෝජ්‍ය පොලිස්පති අම්පාවිල, ජ්‍යෙෂ්ඨ පොලිස් අධිකාරී චාමික වික්‍රමසිංහ ඇතුළු වගඋත්තරකරුවන්ගේ ක්‍රියා හෝ අක්‍රියභාවය හිතාමතා, නොසැලකිලිමත් සහ අසාධාරණ සහ දැඩි ලෙස ක්‍රියා කරන බව පෙත්සම්කරුවෝ වැඩිදුරටත් කියා සිටියහ.