රෝයල් පාර්ක් ඝාතන චූදිත සමන්ත ජූඩ් ඇන්තනි ජයමහ වෙත ජනාධිපති සමාව ලබාදීමේදී තමන් නිසි ක්‍රමවේදය අනුගමනය කරමින් සෑම විටම සාධාරණව කටයුතු කළ බව හිටපු ජනාධිපති මෛත්‍රීපාල සිරිසේන මහතා සිය නීතීඥවරයා මාර්ගයෙන් ඊයේ (13) ශ්‍රේෂ්ඨාධිකරණයට දැනුම් දී ඇත.
ජනාධිපති මෛත්‍රීපාල සිරිසේන මහතා ගත් තීරණය අභියෝගයට ලක්කරමින් ගොනුකළ මූලික අයිතිවාසිකම් පෙත්සම් විභාගයේදී සිරිසේන මහතා වෙනුවෙන් පෙනී සිටි ජනාධිපති නීතිඥ ෆයිස් මුස්තාපා මහතා මෙම අදහස් පළ කළේය. එස් තුරෙයිරාජා, යසන්ත කෝදාගොඩ සහ ජනක් ද සිල්වා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ සිද්ධිය ගැන කරුණු දැක්වීම සඳහා කැඳවනු ලැබීය.
ජනරජයේ ජනාධිපතිවරයා වශයෙන් තම සේවාදායකයා මරණ දඬුවම ලිහිල් කිරීම සම්බන්ධයෙන් එවකට අධිකරණ අමාත්‍යවරයාගේ උපදෙස් මත ක්‍රියා කළ බව ජනාධිපති නීතිඥ මුස්තාපා මහතා අධිකරණයට කරුණු ඉදිරිපත් කළේය. ජූඩ් ඇන්තනි ජයමහ ඇතුළු සිරකරුවන් 70 දෙනෙකු ජීවිතාන්තය දක්වා ලිහිල් කිරීමට එවකට අධිකරණ අමාත්‍යවරයා නිර්දේශ කර තිබූ බවද ඔහු කියා සිටියේය.