අධ්‍යයන චාරිකාවක කොටසක් ලෙස දැනට ශ්‍රී ලංකාවට පැමිණ සිටින ඉන්දීය ජාතික ආරක්ෂක විද්‍යාල නියෝජිත පිරිසක් අද (2023 අගෝස්තු 28) නාවික හමුදා මූලස්ථානයේදී නාවික හමුදාධිපති, වයිස් අද්මිරාල් ප්‍රියන්ත පෙරේරා හමුවිය.
කොමදෝරු අරවින්ද් රාවල් විසින් දූත පිරිසට නායකත්වය දුන් අතර, පාඨමාලා අංක 63 හි ශිෂ්‍ය නිලධාරීන් නව දෙනෙකු (9) සහ එහි අධ්‍යක්ෂක කාර්ය මණ්ඩලයේ සාමාජිකයින් ඇතුළත් විය.
ඉන් අනතුරුව දූත පිරිස වයිස් අද්මිරාල් ප්‍රියන්ත පෙරේරා මහතා සමඟ තොරතුරු සාකච්ඡාවක නිරත විය. මෙම අවස්ථාවෙහි වැදගත්කම සනිටුහන් කරමින් වයිස් අද්මිරාල් ප්‍රියන්ත පෙරේරා සහ කොමදෝරු අරවින්ද් රාවල් අතර සමරු තිළිණ හුවමාරුවක් ද සිදු විය. චීන පර්යේෂණ නැවක් ශ්‍රී ලංකාවේ මුහුදු තීරයට පැමිණීම ගැන ඉන්දීය රජය ගෙනයන අසතුට මැද මෙම නියෝජිත පිරිස පැමිණීම සම්බන්ධයක් නැති බව රජයේ ප්‍රකාශකයෙකු පැවැසීය.