මේ රටේ 2,92,000 ඉක්මවන පුද්ගල ආදායම් බදු ලිපිගොනු තිබුණද ඉන් බදු ගෙවන්නේ 31,000ක් පමණක් බව ජාතික ආර්ථික හා භෞතික සැලසුම් පිළිබඳ පාර්ලිමේන්තු ආංශික අධීක්ෂණ කාරක සභාවේදී අනාවරණය වී තිබේ.
ලියාපදිංචි සීමිත සමාගම් 105,000ක් පවතින නමුත් බදු ආදායමෙන් 82%ක් ලැබෙන්නේ සමාගම් 382කින් පමණක් බවද කමිටුව අනාවරණය කර ඇත.
ජාත්‍යන්තර මූල්‍ය අරමුදලේ දෙවැනි සමාලෝචනය වන දෙසැම්බර් මාසය වන විට උද්ධමනය, රටේ සංචිත සහ රජයේ ආදායම ප්‍රශස්ත මට්ටමක පවත්වා ගැනීම වැදගත් බව කාරක සභා සභාපති පාර්ලිමේන්තු මන්ත්‍රී මහින්දානන්ද අලුත්ගමගේ මහතා මෙහිදී අවධාරණය කළේය.
රාජ්‍ය ආදායම ඉහළ නැංවීමට අවශ්‍ය පහසුකම් සැලසීම සඳහා මෙම කමිටුව ශ්‍රී ලංකා රේගුව, සුරාබදු දෙපාර්තමේන්තුව සහ දේශීය ආදායම් දෙපාර්තමේන්තුව සමඟ නිරන්තර සාකච්ඡා පවත්වන බව ද ඔහු පැවසීය.